«Инықәбаны ицаша цәыкәбарк азы аџьабаа батәума? Аха аԥсҭазаара иснарбаз уи ауп, иара убри ацәыкәбар азыҳәаҵәҟьа аџьабаабара иаԥсоуп. Гәыкала аџьабаа базар - уи ацәыкәбар џьаргьы иқәба изцаӡом», - абас иҩуан Дырмит Гәлиа.

 
Дырмит Гәлиа изгәакьаз Аԥсны аҿиараҟны илагаламҭеи уи имҩаԥигоз иусура амҽхаки џьашьахәуп, ухаҿы аагара уадаҩуп.

 
Жәабранмза 21 рзы 150 шықәса ҵуеит  ҳмилаҭ рҭынха ашьаҭаркҩы ду, аԥсуа литература апатриарх, Аԥсны Жәлар рпоет, арккаҩы, аҵарауаҩ, алингвист Дырмит Гәлиа.

 
Шәааҳаԥхьоит зеиԥш дмаҷыз ауаҩы, зыԥсҭазаара зегьы Аԥсны аҿиара, аизҳазыӷьара иазызкыз Дырмит Есыф-иԥа Гәлиа диижьҭеи 150 шықәса аҵра иазку ахәылԥаз ахь.
Ахәылԥаз мҩаԥысуеит жәабранмза 24 асааҭ 5 рзы Н.В. Гоголь Имемориалтә музеи аҟны  Никитски бульвар 7а аҭыӡҭыԥ ала.

 
Ахәылԥаз апрограммаҟны иҟоуп  алитератураҭҵааҩцәа, ашәҟәыҩҩцәа, аҭоурыхҭҵааҩцәа рықәгыларақәа, иара убас аоператә шәаҳәаҩцәа, Аԥсны Жәлар рартист, Урыстәыла зҽаԥсазтәыз артист Алиса Гыцба, Софиа Сақаниа (асопрано),  амузыкантцәа Виктор Абрамиан, Лана  Адлеиба, Барас Кәыџба, Каиа Хәупориа убас егьырҭгьы.

 
Аусмҩаԥгатә еиҿнакааит Москватәи Аԥсуа Диаспора.